मेनमा भएको घातक गोलीकाण्डपछि आइसद्वारा सवारी साधन रोकेर गरिने जाँच स्थगित
घटनापछिको अवस्थाका केही भिडियो फुटेजहरू सार्वजनिक भए पनि, गोली चलेको क्षण नै देखिने कुनै भिडियो भने अहिलेसम्म सार्वजनिक भएको छैन। डेमोक्र्याटहरूसँग सहकार्य गर्ने मेन राज्यका स्वतन्त्र सिनेटर एंगस किङले पत्रकारहरूलाई बताएअनुसार, घटनामा संलग्न एजेन्टहरूले बडी क्यामेरा लगाएका थिएनन्, जसले गर्दा गोलीकाण्डसँग सम्बन्धित परिस्थितिहरूबारे प्रश्नहरू अनुत्तरित नै रहेका छन्।
वाशिंगटन । गृह सुरक्षा विभाग, (डिएचएस) सम्बद्ध स्रोतका अनुसार टेक्सास र मेनमा सवारी साधन रोक्ने क्रममा भएका छुट्टाछुट्टै घटनामा एजेन्टहरूको गोली प्रहारबाट ६ दिनको अन्तरालमा दुई जना पुरुषको मृत्यु भएपछि, अमेरिकी अध्यागमन तथा भन्सार प्रवर्तन (आइस) ले मंगलबार अध्यागमन सम्बन्धी कारबाहीका लागि सवारी साधन रोक्ने कार्य स्थगित गरेको छ।
पोर्टल्यान्डबाट करिब १५ माइल दक्षिणमा पर्ने तटीय सहर बिडफोर्डमा आइसका एक अधिकारीले एक चालकको ज्यान लिएको भोलिपल्ट यो नीतिगत परिवर्तन गरिएको हो।
गोलीकाण्डको करिब १२ घण्टापछि अमेरिकी गृह सुरक्षा विभागले एक विज्ञप्ति जारी गर्दै जनायो कि, आफूलाई रोक्ने प्रयास गरिरहेका अधिकारीहरूबाट भाग्ने चालकको प्रयासका क्रममा “जनसुरक्षाको चिन्ताका कारण” ती अधिकारीले गोली चलाएका थिए।
चालकले सर्वसाधारणका लागि कसरी खतरा उत्पन्न गरेका थिए वा त्यसले घातक बल प्रयोगलाई कसरी जायज ठहराउँछ भन्नेबारे अधिकारीहरूले स्पष्ट पारेका छैनन्।
इमिग्रेसन एण्ड कस्टम्स इन्फोर्समेन्ट (आइस)ले तय गरेको नीतिअनुसार, अधिकारीहरूले “आफू वा अन्य कुनै व्यक्तिलाई गम्भीर शारीरिक चोटपटक लाग्ने वा मृत्यु हुने आसन्न खतरा” भएको अवस्थामा मात्र घातक बल प्रयोग गर्न सक्छन्; “भाग्दै गरेको संदिग्ध व्यक्तिलाई रोक्ने उद्देश्यले मात्र” यस्तो बल प्रयोग गर्न अनुमति दिदैन।
घटनापछिको अवस्थाका केही भिडियो फुटेजहरू सार्वजनिक भए पनि, गोली चलेको क्षण नै देखिने कुनै भिडियो भने अहिलेसम्म सार्वजनिक भएको छैन। डेमोक्र्याटहरूसँग सहकार्य गर्ने मेन राज्यका स्वतन्त्र सिनेटर एंगस किङले पत्रकारहरूलाई बताएअनुसार, घटनामा संलग्न एजेन्टहरूले बडी क्यामेरा लगाएका थिएनन्, जसले गर्दा गोलीकाण्डसँग सम्बन्धित परिस्थितिहरूबारे प्रश्नहरू अनुत्तरित नै रहेका छन्।
डिएचएसले जनाएअनुसार, एजेन्टहरूले देशबाट निष्कासनको अन्तिम आदेश पाएका एक व्यक्तिको अन्तिम ज्ञात ठेगानामा निगरानी गरिरहेका थिए। ती व्यक्ति निवासबाट निस्किएपछि अधिकारीहरूले उनको कारलाई पछ्याएका थिए।
सिनेटरका प्रवक्ताका अनुसार, डिएचएसका अधिकारी मार्कवेन मुलिनले ‘किङ’लाई बताए कि मारिएका व्यक्ति उक्त कारबाहीको मुख्य निसानामा थिएनन्।
आप्रवासनसम्बन्धी अधिकारकर्मीहरूले गोली लागेका व्यक्ति २६ वर्षीय कोलम्बियाली पुरुष भएको र उनीसँग अमेरिकामा काम गर्ने अनुमति रहेको बताएका छन्। सोमबार भएको यस गोलीकाण्डले तत्कालै विरोध प्रदर्शनहरू निम्त्यायो र मंगलबारका थप प्रदर्शनहरू भैरहेका छन्।
एक वकिलका अनुसार जुन महिनाको सुरुवातदेखि मेन राज्यमा आइसद्वारा गरिएको गिरफ्तारीको संख्या चार गुणाभन्दा बढेर जुलाईको सुरुसम्ममा दैनिक सरदार करिब ७० पुगेको छ।
