मनाङमा नेपाली काङ्ग्रेसका उम्मेदवार टेकबहादुर गुरुङ निर्वाचित
मनाङ । नवनिर्वाचित प्रतिनिधिसभा सदस्य टेकबहादुर गुरुङ मनाङको समग्र उन्नयनमा आफूले पहिलो प्राथमिकता दिने बताउनुभएको छ । प्रतिनिधिसभा सदस्य पदमा निर्वाचित भएपछि उहाँले आफूलाई अमूल्य मतदान गरि विजयी गराउनुहुने सबै मतदातालाई विशेष धन्यवाद समेत दिनुभयो ।
बिहीबार सम्पन्न प्रतिनिधि सभा सदस्य निर्वाचनमा नेपाली काङ्ग्रेसका उम्मेदवार गुरुङ दुई हजार ४१५ मत प्राप्त गरी विजयी हुनुभएको छ । उहाँको प्रतिस्पर्धी नेपाली कम्युनिष्ट पार्टी (नेकपा)का यशोदा सुवेदी गुरुङले ४५४ मत प्राप्त गर्नुभएको मुख्य निर्वाचन अधिकृत रामप्रसाद पौडेलले जानकारी दिनुभयो । उहाँका अनुसार मङ्गोल नेसनल अर्गनाइजेसनका रामबहादुर गुरुङ ९नवीन०ले नौ मत पाउनुभएको छ ।
यहाँ कूल सात हजार मतदातामध्ये दुई हजार ९२३ मत खसेको र ४५ मत बदर भएको जिल्ला निर्वाचन अधिकारी जीवन कुँवरले जानकारी दिनुभयो । जिल्ला कूल मतदाता सात हजार रहेका छन् । अस्थायीसहित २९ मतदान केन्द्रमार्फत मतदाताले मतदान गरेका थिए ।
जिल्लाको विकासमा सक्रिय रहँदै उहाँ पर्यटन र पूर्वाधार विकाससँगै राजनितिक प्रतिनिधित्व गर्नुहुन्छ । विसं २०११ मङ्सिर ११ गते मनाङ ङिस्याङ गाउँपालिका–८ टङ्की मनाङमा उहाँको जन्म भएको थियो । ७१ वर्षीय नेता गुरुङ पार्टीका पाका नेताको रुपमा परिचित हुनुहुन्छ । मनाङको पूर्वाधार, पर्यटन, उर्जा क्षेत्रमा विकासमा उहाँको विशेष योगदान रहेको छ ।
विसं २०७० मा दोस्रो संविधानसभा निर्वाचनमा पनि गुरुङ निर्वाचित हुनुभएको थियो । उहाँ विसं २०७४ को प्रतिनिधि सभा सदस्य निर्वाचनमा नेकपा (एमाले) का पोल्देन छोपाङ गुरुङसँग २८९ मतले पराजित हुनुभएको थियो । त्यसपछि उहाँ पुनः विसं २०७९ को प्रतिनिधि सभा सदस्य निर्वाचनमा निर्वाचित हुनुभएको थियो ।
नेपाली कांग्रेसका तत्कालीन सभापति सुशील कोइराला प्रधानमन्त्री हुँदा विसं २०७० फागुन १३ गतेदेखि विसं २०७२ पुस ९ गतेसम्म श्रम तथा रोजगार राज्यमन्त्रीसमेत बन्नुभएको थियो । विसं २०३६ सालमा वीपी कोइरालाबाट कांग्रेसको सदस्यता लिएर राजनीतिमा प्रवेश गर्नुभएका कांग्रेस मनाङका नेता एवं पूर्व जिल्ला सभापति टेकबहादुर गुरुङ हुनुभएको थियो ।
