संविधान पालना गर्ने पारदर्शी सरकारलाई समर्थन गर्नेछौं : विदेशमन्त्री मार्को रुबियो
काठमाडौं । संयुक्तराज्य अमेरिकाले संविधान पालना गर्ने पारदर्शी सरकारका लागि नेपाली जनताको चाहनालाई समर्थन गर्ने बताएको छ ।
संबिधान दिवसको अवसरमा अमेरिकी विदेशमन्त्री मार्को रुबियोले जारि गरेको संदेशमा दक्षिण एशियामा स्थायित्व प्रवर्द्धन गर्ने तथा सुरक्षित र स्थिर विश्व निर्माणमा योगदान पुर्याउने कार्यमा नेपाललाई साथ दिने जनाएको छ ।
संविधान दिवसको अवसरमा नेपाली जनतालाई बधाई तथा शुभकामना सन्देश दिँदै अमेरिकी विदेशमन्त्री मार्को रुबियोले भनेका छन्, ‘दक्षिण एशियामा स्थायित्व प्रवर्द्धन गर्ने तथा सुरक्षित र स्थिर विश्व निर्माणमा योगदान पुर्याउने कार्यमा नेपालसंगको सहकार्यलाई निरन्तरता दिन उत्सुक छौं ।’
नेपालका जनता आर्थिक वृद्धिलाई अगाडि बढाउने, क्षेत्रीय सुरक्षालाई सबल पार्ने र सबैको समृद्धि प्रवर्द्धन गर्ने आशावादी भविष्यको हकदार रहेको अमेरिकाले जनाएको छ ।
विदेशमन्त्री मार्को रुबियोले मिलेनियम च्यालेन्ज कर्पोरेसन कम्प्याक्टले नेपालको यातायात तथा ऊर्जा पूर्वाधारको विस्तारलाई सहयोग गर्ने, रोजगारी सिर्जना गर्ने, दीर्घकालीन आर्थिक वृद्धिलाई गति दिने, अमेरिका–नेपाल साझेदारीलाई सबल पार्ने र अमेरिकी कम्पनीहरूका लागि व्यवसायिक अवसरहरू सिर्जना गर्ने विश्वास समेत व्यक्त गरेका छन् ।
विदेशमन्त्री रुबियोले आन्दोलनमा ज्यान गुमाएका व्यक्तिका परिवारप्रति समवेदना पनि व्यक्त गरेका छन् ।
